وايد أمهات عقب الولادة القيصرية يتسائلون انه متى يقدرون يبتدون في التمارين الرياضية،، خصوصا انه العملية القيصرية تعتبر متعبة للأم لانها راح تضعف عضلات البطن والقاع اكثر
خلال الستة أسابيع الى الثمانية أسابيع الاولى من بعد الولادة افضل التمارين اللي تقدر الأم تسويهم هم:
1⃣ تمارين كيجلز: هالتمرين جداً مهم لتقوية عضلات منطقتي الحوض و القاع، خصوصا انه هالمناطق تضعف خلال فترة الحمل بسبب ضغط الجنين عليها
طريقة التمرين: الأم تكون منبطحة على الظهر مع ثني الركب، تتخيل الام انها قاعدة تحبس البول ( عزكم الله) و تعد الى 10، عقبها ترخي، تقدر تكرر التمرين في البداية الى 5 مرات في الصبح و مثلها في الليل ، عقب ما تحس انها متمكنة منه تزيد عدد المرات بالتدريج لما توصل الى 10 مرات في 3 فترات في اليوم
2⃣ التمرين الثاني اسمه Posterior Pelvic Tilt: نفس وضعية التمرين السابق بس في هالتمرين تشفط الأم عضلات البطن الى الداخل و تعد الى 10، و عشان تتأكد الام انها قاعدة تسوي التمرين بالصورة الصحيحة، نطلب منها انها تثبت احدى اليدين تحت منطقة أسفل الظهر، و اثناء عملية شفط البطن راح تحس انها تضغط على يدها
و نفس الشي تقدر تسوي هالتمرين خمس مرات في اليوم صباحا و مساء و عقبها تزيد بالتدريج
في نقاط مهمة بعد حابة أني أوضحها عشان تساعد الام انها تتعافى بصورة أسرع:
1⃣ عقب ما ترجعين البيت، لا تمين كله قاعدة مكانج، تحركي بين كل ساعة الى ساعتين حركة خفيفة مثل انج تمشي في البيت لمدة دقيقة الى دقيقتين، هالشي راح ينشط الدورة الدموية في الجسم
2⃣ تعتبر اول ستة الى ثمانية أسابيع عقب الولادة فترة نقاهة الى الأم، خصوصا ان العملية القيصرية مو بالشيء السهل، فلا تستعجلين على العودة الى التمارين العنيفة اللي كنتي متعودة تسوينها قبل الحمل و الولادة، عقب هالفترة افضل شي تقدرين تسوينه هو انج تمشين مشي خفيف في جو معتدل (عشان الجرح لا يتأثر) ابتدئ بمشي خفيف لمدة خمس دقائق، و اذا حسيتي انج متمكنة من هالمدة و ما حسيتي بأي الم، تقدرين تزيدين خمس دقايق ثانية في كل مرة
3⃣ متابعتج الدورية مع دكتورتج من اجل صحة الجرح و الأمور الصحية الاخرى امر مهم جداً للحصول على افضل النتائج
4⃣ اول ستة شهور من العملية تعتبر فترة تغيير هرمونات، فشيء طبيعي انه مزاجج يكون متقلب و تحسين بضعف في عضلات جسمج و المفاصل
لهذا السبب تدرجي في التمارين عشان تتجنبين الالام المفاصل في المستقبل
تعليقات
إرسال تعليق