بسم الله الرحمن الرحيم .
كنت في غرفة الانتظار في مستشفى رويال .
لما قريت في بروشور انه في شركة تساعد في تخزين الخلايا الجذعية
شنهي الخلايا الجذعية ؟ هي الخلايا الموجودة في الأوعية الدموية في المشيمة والحبل السري ، أول كانوا العلماء يدورونها دوارة عشان يعالجون فيها الأمراض المستعصية والسرطانات وغيرها.
ليش ؟ لأن هذه الخلايا ممكن تتحول إلى أي نوع آخر من الخلايا ، وكل خلايا جسمنا كانت في الأصل خلايا جذعية Stem Cells
أول ما فكروا قالوا ناخذها من الأجنة وهما يكبرون فقاموا عليهم الناس انه هذا شي مو أخلاقي.
بعدين بدوا يفكرون بالاستنساخ و..
وفجأة .
اكتشفوا انه اللي يدورون عليه .
موجود و يتوفر مع كل ولادة وللأسف ينقط بالزبالة ! وين ؟ في المشيمة والحبل السري.
دمهم عبارة عن خلايا جذعية
فبدأوا يسحبون الدم
ويخزنونه
ويعالجون فيه الأمراض
مثل : أمراض فقر الدم الوراثية اللي مالها علاج : الثلاسيميا و الأنيميا المنجلية
سرطانات الدم
وبعض الأمراض اللي تتعلق بالدم
ولما سبق ذكره العلاج 100% والدراسات الحين والمحاولات تبشر بالخير.
وهذا المستقبل مثل ما يقولون .
من الأمراض التي ستضاف الى اللسته انشاءالله : ( صراحة في مراكز بدأت تستقبل هالحالات بس مادري عن النتائج ) السكري ( النوع الثاني ) أمراض القلب الروماتيزم الخشونة التوحد مرض باركنسون Multiple Sclerosis مرض التصلب المتعدد - منتشر بشكل مخيف بين الشباب والشابات بالكويت وكل ما أبحث في الانترنت
أكتشف لسته جديدة للبحث حطي : Stem cell Therapy نرجع إلى محور حديثنا : هذا الشي المتطور ماشاء الله بدت فيه الإمارات بالقطاعين الحكومي والخاص في الصحة ، وكذلك السعودية بس مادري شلون
الحريم هناك قبل الولادة يبلغونهم ان دم المشيمة راح يتجمع
ويوقعون
وينحفظ الدم كأمانة للغد
بدت فيها الإمارات من كثر الأمراض الوراثية بسبب زواج الأقارب
بالكويت ( العالم الثالث ) .
شركة Cryo-Save البلجيكية بالامارات افتحت فرع بالكويت ووكلاءها الملا والغنام ( أصحاب رويال حياة ) و حاليا كل يوم مستعدين يرسلون عينات الخلايا الجذعية إلى الامارات ليتم تخزينها باسمكم هناك للمستقبل
المنتفعين منها : الطفل نفسه ( تطابق 100% ) الاخوان والأم والأب ( تطابق أقل لكن أكثر من 60 % وهذا زين )
لأي مرض لا سمح الله يصير في المستقبل
التكلفة الإجمالية : 960 دينار كويتي ( تخزين لمدة 20 سنة ) لما تخلص ال20 سنة
لازم تدفعون رسوم أجار لل20 سنة اللي وراها وراح تكون أقل من 960 ( لأن هالمبلغ جزئين : 225 تكلفة جمع العينة والباقي للتخزين )
انا محضرة نفسي وانشالله اخزن للمستقبل
أبرك من اني أقط فلوسي عالاستقبال وغيره
حبيت أفيدكم
والله لا يحوجنا ويديم علينا الصحة والعافيه
تلفونهم بالكويت : 5313484 انا محضرة عدة الجمع ولازم آخذها معاي وقت الولادة
أغلب الدكاترة في المستشفيات الخاصة يعرفون طريقة الجمع
وفي اجتماعنا أنا وزوجي مع موظفة الشركة بالكويت، جاوبت على كل أسئلتنا واحنا مقتنعين ومستعدين
بيني وبينكم : قسمنا التكلفة بيننا أنا وزوجي ، لما شفته متردد اقترحت عليه هالاقتراح
بالتوفيق حبيباتي
تعليقات
إرسال تعليق