بروهم قبل ان يبروكم

تذكرين أول مرة حملتي؟ شنو نصحوچ فيه أغلب الناس؟؟

النصيحة اللي مافي وحدة ماسمعتها(( طلبي خدامة ))

لي هني احنا بالسليم،، الخادمة للتنظيف

لكن المصيبة وين؟؟

إذا وصل البيبي على الدنيا

سمعوا النصايح

( خليه عندها ونامي)

( لا تطلعينه معاچ خليه عند الخدامة و طلعي)

( ليش هالعذاب خليها اهيا تبدله و تسبحه).

( ليش ماخذة إجازة خليه عند الخدامة و داومي).

و انتي تنازعين قلبچ يقولچ لأ و النصايح كلها ضد فطرتچ،،الأم اللي بكل بقاع الأرض هذا دورها،، بمجتمعنا إذا شافوها شالت عيالها أو بدلت لهم في زوارة أو طالعة معاهم مجمع بدون خادمة أو تمارس أي حق من حقوق الطفل عليها،، تلقى هجوم موووو طبيعي

شلون انقلبت المفاهيم؟؟

شلون صار الطبيعي الطفل بيد الخدامة

المو طبيعي أمه ترعاه!! و ينادون بالتربية و يقولون بالرعاية فوضي المهام !! و الكلمة المشهورة للي عندها خادمة بس ماتسلمها أطفالها(( وي ليش مريحتها جذي )) !

ذابت عندنا المفاهيم،، نسينا شي اسمه خصوصية، طلعة عائلية حميمية، التلذذ بالنعم صار بالماركات و المطاعم،، الاستمتاع بالأمومة صار بالتصوير و التفاخر بآخر الهبات!!

بس دام آنا قدرت انتي تقدرين

إي ربيهم بيدچ

إي أبوهم لازم يربي و إن ماكان فعّال مو مبرر تهملينهم إي وصليهم المدارس نزلي استلميهم بدل الخدامة

إي وديهم الطبيب و نوميهم بحضنچ صيري مختلفة بغرفة الانتظار إي تلذذي إي استمتعي ..

الخدامة كل عمل اداري سلميها اياه و التفتي للهالأرواح العاجزة المحتاجة لچ،، من حقچ حبهم من حقچ أحضانهم من حقچ انتي وأبوهم تستانسون بهالفترة القصيرة من مراحل عمرهم،، زرعي و باچر تحصدين،، اسقيهم مشاعر.

ضناچ،،لمّا بجى شم ريحتچ،

لمّا يركض مايبي يلبس شاف طولة بالچ،

لمّا دش الحضانة ارتاح إنچ انتي اللي موجودة دايماً،،

لمّا راح المدرسة أول قصة بالهدة كانت لچ

،، لمّا يلعب بالألعاب يفتخر بحركاته جدامچ،،

صدقوني هذا الطبيعي والله،، المتداول و قاعد يصير وتشوفه عيونا هذا اللي لازم نستنكره،، مو الأم اللي ماخذه الرضيع و رايحة تستلم الكبير من مدرسته،، مو الأم اللي تدز العربانة بالمجمع،، مو الأم اللي تقوم تغيّر للبيبي وانتوا نچبتوا الغدا بس ماهي متضايقة،، لا تحسسونها انها غلط لا تشعرونها بالعار، لأنها منطقية مانجرفت مع الأغلبية ،و سمعت نداء الفطرة

تدرون في شي اسمه عقوق صح؟؟ تدرون في عقوق للأبناء!! اي نعم لازم نبرهم بوقت حاجتهم لنا،، مو بس ننطره يكبر و نطالبه يبرنا و اهو ذاكرته خالية من حبنا

سبحان رب العباد قال (( و قل ربي ارحمها كما ربياني صغيرا )) تتوقعون اشمعنا صغيرا؟؟

#ضناي_غالي منقول من اكاونت ام كويتية