العناية باليدين

تعتنون بوجهكم و تقطون عليها فلوس و توقفون جدام المرايا و كريم بالليل و كريم بالنهار و مو معبرين ايدينكم و هي مثل الوجه تتعرض يوميا للشمس و الرياح و الغبار

لا و اكثر بعد تتعرض للمنظفات و المواد كيماويه و بلاوي

تدرون شبيصير؟! بتفضحكم و بتكشف عن اسرار انتو خاشينها! عشان جذي اليوم نبي ناخذ دقايق من وقتكم عشان نتعرف على اسرار العنايه باليدين قبل لا تكشف اسرارنا السر الاول: اغسلوها بعنايه

اذا عندكم مواعين وصخه حيل بالدهون شلون تغسلونها؟ بماي حار و صابون قوي

و هذا اللي ما نبي نسويه بايدينا لان على الجلد في طبقه دهنيه طبيعيه ما نبي نشيلها و نسبب جفاف و تشقق للجلد

عشان جذي الماي ما نبيه حار و الصابون نبيه لطيف مثل دوڤ او ستافيل

صابون قوي او مضاد للبكتريا ما نبي الا اذا الطبيب وصفه لكم السر الثاني: الترطيب

بعض الناس يحبون اللوشن حق الترطيب

اللوشن زين اول ما تحطونه لكن الماي اللي فيه يتبخر بسرعه و الجلد يصير ناشف

الافضل هو الكريم و اذا البشره جافه حيل المرهم هو الافضل مثل الڤازلين

مو شرط تستعملون مرطب غالي لكن المهم انكم تحطونه عند المغسله و ترطبون ايدينكم بعد غسلها مباشره

تكلمنا عن الڤازلين و عندكم دوڤ او نيڤيا او ستافيل السر الثالث: خلو لبس القفازات شي روتيني

يعني ما سويتو شي اذا تغسلون ايدينكم بصابون لطيف و تغسلون المواعين او تنظفون بدون قفازات !!! اذا تبون تغسلون المواعين او اي شي يتعلق بالماي و المواد المنظفه البسو قفازات قطن و البسو عليها قفازات ربر طويله

اذا بتقطعون بصل او طماط و الشغلات هذي استعملو قفازات الاستعمال الواحد

قفازات القطن ممكن تلبسونها بالليل لمن رطبتو ايدينكم عدل و تبون تنامون

رطبوها بڤازلين مثلا و البسو و نامو

جربوها عجيبه السر الرابع: الحمايه من الشمس على طووول

مهم جدا عشان لا تتصبغ و لا تتجعد و تظل شباب السر الخامس: سنفره خفيفه مره بالاسبوع عشان تشيلون الطبقه الميته الخارجيه

مثلا ممكن تخلطون نص كوب سكر مع ثلاث ملاعق كبيره زيت الزيتون مع ثلاث ملاعق كبيره ماي

و حطوها على ايدينكم و افركوها بلطف مثل ما تغسلون ايدينكم و لين ما السكر يدوب تماما و ما تحسون بذراتها

و اشطفوها بالماي و حطو مرطب على طول

سووها مره بالاسبوع الخمسه اللي فوق حق الكل

اما بالنسبه للصوره و العروق البارزه الي باليد فنستخدم ابر خاصه تعتبر وسيط بين الفيلر و الميزوثيرابي وظيفتها انها تخفي العروق الي في اليد و ترطب الجلد و مفعولها يطول ست اشهر